Sólber (Ribes nigrum) er sumargrænn runni af garðaberjaætt (Grossulariaceae) ættaður frá N- og M-Evrópu ásamt N-Asíu. Sólber eru fremur harðgerð og auðræktuð. Þau hafa lengi verið ræktuð hérlendis en aldrei orðið eins vinsæl og venjulegt rifs (Ribes x pallidum og R. rubrum). Hæð sólberja er 1-2 m, allt eftir yrkjum og aðstæðum. Runnarnir verða 80 – 150 sm á breidd. Allur runninn lyktar, sérstaklega blöð og brum séu þau nudduð. Laufblöðin eru handflipótt með 3-5 flipum. Berin eru fullþroska svört, nokkur saman í klasa.