Undanfarna dag hef ég verið að opna gamlar möppur í tölvunni minni og líta yfir farinn veg, ljósmyndalega séð. Hver þróunin hefur verið og hvort það væri komið að því að fara vinna eitthvað af þessum gömlu myndum.

Það var 18. Október 2002 kl.12:07:53 að ég fór með mína fyrstu DIGITAl myndavél sem hét Fujifilm, FinePix6900ZOOM niður í Reynisfjöru að taka myndir. Það var á þeim tíma sem hægt var að taka myndir þar án þess að10.943 ferðalangar væru að þvælast fyrir á myndinni, sumir að reyna að drekkja sjálfum sér og aðrir að taka sjálfur. Ég man líka að ég ók á jeppanum mínum alla leið niður í fjöru þennan umrædda dag, sem var ansi þægilegt.

Hvað um það.

Þegar ég opnaði þessa tilteknu mynd, sagði ég við sjálfan mig “Afskaplega er þetta lítið falleg mynd, skildi vera hægt að gera eitthvað fyrir hana”.

Tímarnir hafa breyst á þessu 21 ári sem liðið er frá myndatökunni og Gervigreindin komin til sögunar. Hugbúnaðarfyrirtækin hafa keppst við að gefa mér nýjustu myndvinnsluforritin og þau eru öll hlaðin af “Artificial intelligence (AI)” hugbúnaði, svo mér fannst rétt að sjá hversu megnug þau væru og hvað þau gætu nú gert fyrir þessa blessuðu mynd.

Árangurinn lét ekki á sér standa og hinar ýmsu útfærslur urðu til, en þá þá fór ég að velta því fyrir mér, “Hvenær hættir ljósmyndin mín að vera ljósmyndin mín?”   Hmmmmm. . . .

Reynisdrangar eru nokkrir klettadrangar, allt að 66 metra háir, úti í sjó sunnan við Reynisfjall í Mýrdal og blasa vel við bæði úr Reynishverfi og frá Vík í Mýrdal.

Drangarnir eru myndaðir í eldsumbrotum en gömul þjóðsaga segir að þeir hafi orðið til þegar tvö tröll hafi ætlað að draga þrísiglt skip að landi en verkið tók mun lengri tíma en þau höfðu ætlað, svo að þegar dagur rann urðu tröllin að steini og skipið einnig. Næst landi er Landdrangur, sem á að vera tröllkarlinn, þá er Langhamar eða Langsamur (skipið), síðan Skessudrangur, sem einnig kallast Háidrangur eða Mjóidrangur, og hjá honum er svo lítill drangur sem kallast Steðji.

Töluvert fuglavarp er í dröngunum, bæði fýll, lundi og langvía, og fóru íbúar Reynishverfis þangað til eggjatöku um langan aldur en það var þó oft erfitt því bæði var mjög oft brimasamt við drangana og eins eru þeir víða illkleifir eða ókleifir með öllu. Nú er boðið upp á siglingar í kringum drangana til að skoða þá og fjölskrúðugt fuglalífið.