Fyrst var byggður viti í Gróttu árið 1897 að fyrirsögn starfsmanna dönsku vitastofnunarinnar. Núverandi viti var reistur hálfri öld síðar, árið 1947, sívalur kónískur turn úr steinsteypu með ensku ljóshúsi, 24 m að hæð, hannaður af Axel Sveinssyni verkfræðingi. Upphaflega var vitinn húðaður utan með ljósu kvarsi en hefur nú verið kústaður með hvítu þéttiefni.

Linsan sem sett var í vitann frá 1897 er enn í notkun í Gróttuvita. Gastæki var sett í vitann er hann var tekinn í notkun en hann var rafvæddur árið 1956.

Vitavörður var búsettur í Gróttu frá 1897 til 1970. Vitaverðirnir voru aðeins tveir, Þorvarður Einarsson og Albert sonur hans. Vitavarðarhúsin hafa nú verið gerð upp og eru í eigu Seltjarnarnesbæjar.

Eyjan Grótta er einstök náttúruperla vestast á höfuðborgarsvæðinu. Hún er um 5 hektarar og tengist landi með Gróttugranda. Þar er að finna óspillta og einstaka náttúru. Fjörurnar sunnan við Gróttu, Seltjörn og Bakkavík eru hentugar til útivistar og eru auðugar af lífi sem vert er að skoða. Þá er fuglalífið mjög fjölbreytt og sést hafa um 106 fuglategundir á Seltjarnarnesi. Lífið í og við Bakkatjörn er áhugavert að fylgjast með og kanna. Á fjöru er hægt að komast fótgangandi út í Gróttu. Hægt er að dvelja í eynni á fjörunni í um 6 klst.

Yfir sumartímann er hægt að finna um 140 tegundir háplantna sem er um 1/3 af heildafjölda plöntutegunda landsins.