Flakið er af landgöngupramma sem hefur legið hér í fjöruborðinu á Tanga allt frá árinu 1966

Pramminn kom vestan af fjörðum þar sem ameríski herinn notaði hann, knúinn tveimur díselvélum til flutninga til ratsjárstöðvarinnar á Straumnesfjalli. Hann var einnig nýttur í Ísafjarðardjúpi til að ferja m.a. jarðýtur milli staða, en hægt var að leggja niður gaflinn að framan og keyra upp í sandfjöru.

Þegar komið var upp síldarplani í Brekkuþorpi í Mjóafirði árið 1965 var pramminn fenginn vélarlaus austur til að flytja burt síldarafskurðinn. Var pramminn þá dreginn frá Mjóafirði til Norðfjarðar þar sem landað var til bræðslu.

Pramminn var þó einungis í notkun í Mjóafirði í tvö sumur áður en honum var endanlega lagt hér á þessum stað. Hann þótti óhagstæður vegna þess að hann er þver fyrir og voru menn hvað eftir annað rétt við að missa hann niður á leiðinni yfir á Norðfjörð.