Gamla húsið að Minna-Knarrarnesi sem byggt var 1875 ver rifið árið 1930 þegar flutt var í nýtt hús. Húsið byggði Sigurður Gíslason árið 1929-1930 og er það með reisulegri húsum í hreppnum. Árið 1940 fóru gömlu hjónin þau Gísli og Guðný frá Minna-Knarrarnesi og til barna sinna. Þá seldi Sigurður hús og jörð hjónunum Brynjólfi og Margréti frá Hellu. Þau hjónin lifðu að mestu á jörðinni sem talin var allgóð bújörð, auk þess stundaði Brynjólfur ýmsa vinnu er til féll. Þau eignuðust 7 börn 1) Brynjólf, 2) Þórarin, 3) Elísabetu, 4) Reyni, 5) Ólafíu, 6) Unni, og 7) Garðar.

Núverandi ábúendur eru Birgir Þórarinsson guðfræðingur og fv. varaþingmaður í Suðurkjördæmi ásamt  Anna Rut Sverrisdóttir. Þau hafa reist þar bændakirkju í 19. aldar stíl í túninu rétt við svokallaða Brandsleiði sem raunar enginn veit hvað táknar. “Knarrarneskirkja” rúmar 30 manns í sæti. Bekkirnir í kirkjunni eru gamlir kirkjubekkir úr Kálfatjarnarkirkju og meira en 100 ára gömul skipsklukka verður kirkjuklukkan. (Heimild: Mbl. / Mannlíf og mannvirki í Vatnsleysustrandarhreppi)