Sunnan við Voga, ekki langt frá Reykjanes-brautinni eru Snorrastaðatjarnir, falleg náttúruparadís sem í áratugi hefur verið vinsælt útivistarsvæði meðal Suðurnesjamanna.

Margir bera sterkar taugar til svæðisins, sem tengist æskuminningum þeirra. Við tjarnirnar vex fjölbreyttur gróður og eru þær mikilvægur áningarstaður farfugla. Snorrastaðatjarnir eru á náttúruminjaskrá.

Þessari náttúruperlu og fuglalífinu þar stendur nú ógn af Suðurnesjalínu 2. Í matsskýrslu vegna hennar segir m.a: „Suðurnesjalína 2 og Kolviðarhólslína 2 munu hafa talsverð neikvæð sjónræn áhrif fyrir útivistarfólk þar sem þær liggja næst Háabjalla og útivistarsvæðinu þar í nágrenninu. Þá er talið að Suðurnesjalína 2 og Kolviðarhólslína 2 frá Hvassahrauni að Njarðvíkurheiði muni hafa fremur neikvæð áhrif á ferðaþjónustu og útivist á því svæði, einkum í nágrenni Háabjalla og Seltjarnar”. Þess má geta að landeigendur og bæjaryfirvöld í Vogum voru upphaflega sammála um að línan ætti að fara í jörð. Landsnet hafði hins vegar sínu fram með ofstopa, yfirgangi og að sögn með óheiðarlegum vinnubrögðum. Það verður mikil lýti að fá rafmagnslínur á þetta mikilfenglega og viðkvæma svæði

Fagradalsfjall er móbergsfjall á Reykjanesskaganum vestanverðum. Það er talið vera vestasti hluti Reykjanesfjallgarðsins, en vestan þess eru stök fell. Fagradalsfjall er aflangt frá austri til vesturs, um 385 metrar á hæð og er þar með hæsta fjall á Reykjanesskaga. Það hefur orðið til á ísöld við gos undir jökli og er smáhraunlag á því ofanverðu, sem gefur til kynna að gosið hafi náð lítið eitt upp úr jöklinum. Fjallið flokkast því sem stapi.

Þann 3. maí 1943 fórst herflugvél Bandaríkjahers á Fagradalsfjalli. Fjórtán manns létust en einn komst lífs af. Meðal hinna látnu var Frank Maxwell Andrews en hann var afar háttsettur í bandarískra hernum og heimildir segja að hann hafi átt að stýra innrásinni í Normandí í Evrópu. Eftirmaður hans í hernum var Eisenhower sem síðar varð forseti Bandaríkjanna. Flugvélin mun hafa ætlað að lenda á flugvellinum í Kaldaðarnesi.

Að kvöldi 19. mars árið 2021 hófst eldgos úr sprungu í dölunum, fyrsta eldgosið á Reykjanesskaga í 800 ár.